హౌతీ దాడుల భయం.. బంకర్లలోకి సౌదీ యువరాజు!

సౌదీ అరేబియాపై యెమెన్‌కు చెందిన హౌతీ తిరుగుబాటుదారులు క్షిపణి, డ్రోన్ దాడులను తీవ్రతరం చేయడంతో ఆ దేశ వాస్తవ పాలకుడు, యువరాజు మొహమ్మద్ బిన్ సల్మాన్ ప్రాణభయంతో అజ్ఞాతంలోకి వెళ్లినట్లు తెలుస్తోంది. 'వాల్ స్ట్రీట్' జర్నల్ కథనం ప్రకారం ఆయన రియాద్‌లోని అత్యంత పటిష్ఠ‌మైన భద్రత, బంకర్లు కలిగిన రాజప్రాసాదాల మధ్య తన మకాం మారుస్తున్నారు. ప్రత్యేకంగా ఎంపిక చేసిన భద్రతా బృందం ఆయనకు నిరంతరం కాపలా కాస్తోంది. గడిచిన మంగళవారం ఓ రక్తదాన శిబిరంలో పాల్గొన్న తర్వాత ఆయన మళ్లీ బహిరంగంగా కనిపించలేదు.

ఇటీవలి కాలంలో హౌతీలు సౌదీ రాజధాని రియాద్‌ను లక్ష్యంగా చేసుకుని దాడులు పెంచడమే ఈ భద్రతాపరమైన ఆందోళనలకు ప్రధాన కారణం. గత శనివారం రియాద్‌లోని కింగ్ ఖలీద్ అంతర్జాతీయ విమానాశ్రయంపై హౌతీలు ప్రయోగించిన బాలిస్టిక్ క్షిపణి పెను విధ్వంసం సృష్టించింది. 

ఈ ఘటనలో 12 నుంచి 13 మంది ప్రాణాలు కోల్పోగా, 300 మందికి పైగా గాయపడ్డారు. ఎయిర్‌పోర్ట్‌ టెర్మినల్స్ కూడా తీవ్రంగా దెబ్బతిన్నాయి. ఆదివారం, ఆ తర్వాత కూడా దాడులు కొనసాగడంతో విమానాశ్రయాన్ని తాత్కాలికంగా మూసివేశారు.

మరోవైపు హౌతీల నుంచి వస్తున్న దాడులను అడ్డుకోవడానికి అవసరమైన ఇంటర్‌సెప్టార్ క్షిపణుల నిల్వలు సౌదీ అరేబియాలో వేగంగా అడుగంటుతున్నాయని సౌదీ అధికారులు ఆందోళన వ్యక్తం చేస్తున్నారు. దీంతో అందుబాటులో ఉన్న వాయు రక్షణ వ్యవస్థలను రాజకుటుంబ నివాసాలు, ఇంధన ఉత్పత్తి కేంద్రాలు, ఇతర వ్యూహాత్మక ప్రాంతాల రక్షణ కోసం తరలిస్తున్నారు. 

ఇరాన్ మద్దతున్న హౌతీలు విమానాశ్రయాలు, ఇంధన క్షేత్రాలను లక్ష్యంగా చేసుకోవడం సౌదీ ప్రతిష్టాత్మక 'విజన్ 2030' ప్రణాళికపై ప్రభావం చూపుతుందని ఆందోళనలు వ్యక్తమవుతున్నాయి. పర్యాటకం, పెట్టుబడులను ఆకర్షించాలన్న సౌదీ లక్ష్యాలకు ఈ దాడులు గండికొట్టే ప్రమాదం ఉంది.

ఈ పరిణామాలు ఇరాన్, అమెరికా, ఇజ్రాయెల్ మధ్య కొనసాగుతున్న విస్తృత ప్రాంతీయ ఉద్రిక్తతలలో భాగంగానే కనిపిస్తున్నాయి. ఈ సంక్షోభం నుంచి బయటపడేందుకు సౌదీ అరేబియా ఒకవైపు మిత్రదేశాల నుంచి అదనపు సహాయం కోరుతూనే, మరోవైపు దౌత్యపరమైన మార్గాలను కూడా అన్వేషిస్తోంది.